Luk 7 | ASO | STEP | Izesu' aza a'mine mono' gamazi nene evene' a'mida minani' nene lo-ngemo osu' lo Kahanaumi numuno ebeku' vine'.

Luke 7

Izesu' Aza Amiliti Gizebo Ve'ine'mi Gelekele' Izipe Ma Do Guno O-dine' Gamazi Gizine'

(Mataio' 8:5-13)

1 Izesu' aza a'mine mono' gamazi nene evene' a'mida minani' nene lo-ngemo osu' lo Kahanaumi numuno ebeku' vine'. 2 A'mida nene Loma amiliti gizebo ve ma minine'. Eze gelekele' izipeuti' vonolo' minive nene inite' gize do helaa' akalo' vo minine'. 3 Ne'mine ogo neivo amiliti gizebo ve aza nene Izesu' guvele gelo aza ogo gelekele' izipe do lamine' o-delive li vi li-imilizave lo Zuda veti gizebo ve'ine linge ma ngimiseline'. 4 nGimiselavo ingine Izesuda vi heteli a'mine gamazi li-imi amuzonga ti' li li-imani': Isaa' neve. Loma amilo' gizebo ve aza lulo nene leli' Zuda ve lemaa' neive. Ido' mono' numude nesi nene gizilizave lo moni huko hulavo gizune. Ne'mine oga' neine' nenako gaza ei' line' inite' nene ha o-delinido' lisihe' o neive. 6 Ne'mine li li-imikevo Izesu' aza inginesi maka' vani'. Izesu' aza olihe numudo' vo hetelamo avita navo amilo' gizebo ve aza gamazi ti' lo loo eze zogo ve linge Izesuda ngimiselavo vani': Guvekasi ve, naza evene' goloso nouvonako a'ne'mine'mi numu'neu' alinido' lisihe' amaninako hotati' ogo mela alinido' gabusoka elalive. 7 Ido' naza geita vamuvoni' nene naza heta ato' ve goloso nouvonako nemu' geita alodo' lisihe' amuve. Nemu' nene gaza gamazivo' lo lamine' ozo lolosane. Lanivo neni' gelekele' izipe'ne nene lamine' ilive lo gele nouve. 8 Ido' lamine' ilive lo gele nouvoni' nene naza evene' maliti gizebolo' nouve. Ido' neze gizebolo' nesi nene ami ma nizave. Nemu' nene engikuti' ve mamu' vozo lokuvo ha voloseive. Ido' mamu' ano loloni' nene ha aloseive. Ido' gelekele' izipe'ne nene ne'mine ozo loloni' ha oloseive. Ido' a'mine'mine ogo gaza lanivo siki inite' ne'mo gei' gamazi nene ha gele do gelekele' izipe'ne nene ha hulo-do voloseive losa gele nosa noluve. 9 Lavo Izesu' aza gamazi line' nene gelo aizo lo gelo mine velepe' izo e'meti vave muki' nene ti' lo lo-ngimine': Naza ti' lo nolo-lingimuve. O'mosomu' gili ele'vole' iga' ave gehepeve ve lave lengi' Isilaele' aleve lengikutikisi nene heta ato' ve mene'mo gele ele'vole' ine' ne'mini ve hamolitesi gili ele'vole' avo ma ningamuvoni' ve. 10 Ne'mine lavo amilo' gizebo ve'mo ngimiselive ingine tine' mili numu'vela vi ningani' nene gelekele' izipe aza lamine' ogavo ningani'.

Izesu' Aza Naini Numudoti' Vene' Geto' Mali'mi Gipele Hilinguti' Do Ote-dine' Gamazi Gizine'

11 Ne'mine ogavo neloti' gamene ha'na vamivo Izesu' aza numuno ebe' ma gulive Nainila novivo izipahala zuhosi evene' mukikisi nene e'metavo makato' vani'. 12 Maka' vo numuno ebeli'mi gateda nohetelivo vene' geto' ma minine' ne'mi gipele hamokovo' minine' nene helavo vene' geto' nene a'mine numuno ebekuti' evene' vai' nene mulumo gili-di e'meti minavo a'mine gonoso nene zalo' mili numuno ebekuti' galese izi-dilisa di heta ani'. 13 Ne'mine navo Guvelesi ve aza hilive'mi izelehine nene ningo muluno hukavo a'mine vene' nene ti' lo lo-imine': Gaza ive nama amozo. 14 Ne'mine lo avito' vo a'mine hilive ongo minine' initeto' nene davo gonoso zalo' milave nene a'mido' legeni oti minani'. Oti nizavo ti' lo line': Goso' ve, gaza gohi veka gizo oteline nolo-giduze. Otezo. 15 Lavo hilive aza oto mito' mino gamazi api' ogo nolivo a'mine hilive nene izelihida gohi do ti'no imine'. 16 Ne'mine ogavo vene' vemoho' muki' nene ngehelele naba goloso izavo O'moso opo'ni li ti' li lani': Leli' vovoteu' nene polohete naba ma soto' ogave. Ido' O'moso ne'mo eze evenele mulumote ningo hize ele' o-ledave. 17 Likevo Izesu' ne'mine ine' guvele ne'mo Zudaia misubo mukikukisi ido' Zudaia misubo gaheve gahevela misubo mukiku' nesi nene buu lo mone osu' line'.

Izesu' Aza Noso Holo-ngedaa' Ive Zohane'nimu' Line' Gamazi Gizine'

(Mataio' 11:2-19)

18 Ido' mono' noso holo-ngedaa' ive Zohane' izipahala zuho nete Izesu' ne'mine mana'mine monovo do soto' ogo minine' nemu' nene Zohane'ni li-imani'. 19 Ne'mine ikevo Zohane' aza izipahala zuho sita' vise lo-ngedo gamazi ti' li longo' i-dilisive lo Guvelesi vela ngeletine': Gaza nene O'moso'mo imiselavo aloseive li li-limave ma nene nabe ido' ve gohi ato' mamu' gizebo olone' o neive. 20 Ne'mine lavo a'mine ve sita' ingine Izesuda vi heteli ti' li li-imasine': Laza nene noso holo-ngedaa' ive Zohane' ti' lo losa leletavo nousive: Gaza nene O'moso'mo imiselavo aloseive li li-limave ma nene nabe ido' ve gohi ato' mamu' gizebo olone' o neive. 21 Ne'mine likesivo a'mine minasine' gameneu' gehepeve nene aza inite' ato ato' gizi dave vai' do lamine' o-ngedo evene' lu'ninguti' sikalahu' goloso ngelete hulo ido' ve'ine likive muki' nene do lamine' o-ngedavo gohi ve'ine ningi minani' ve. 22 Ne'mine ogosa aza Zohane' izipahala ti' lo lo-ngimine' ve: Lingine tine' mili vi Zohane'ni nene neni' gono noduvo gilasine' ido' ningasine' initekumu' nene ti' li li-imilizo: Ve'ine likive ingine ve'ine gohi niningave. Ido' gize'ine goloso ive nene gohi aka nimonavo ganadise gizi dave nene gohi kululu' niizave. Ido' ga'ine molave nene ingine gohi nigilavo hilave nene gohi do noote-ngidive. Ido' goho' aleve nene mono' gamazi lamine' nigilave. 23 Lingine ne'mine li li-imi ti' li li-imilizo: Gaza neni' monovomu' gaka sita sata' nogelaine' ma nene hulo nenikumu' gele ele'vole' iline' nene mine lamine' ogo mineline' akalo' e'meto volosane. Ido' evene' muki' ingine ga'ine sita sata' gilami nenikumu' gili ele'vole' ilizave nene mine lamine' igi miniliza akalo' e'meti vilisave.

24 Ne'mine lo lavo Zohane' ngimiselive ingine tine' mili nivasivo evene' vai' minani' nene Izesu' aza Zohane'nimu' api' ogo ti' lo lo-ngimine': Lingine evene' muki' Zohane'ni ningilisa ebe' hadivela vani' ma nene nanite' ningilisa vani' neve. A'mida nene hepeli'mo do gabe' kabe' oga' neine' inite' gepe' ne'mino gamazi do ti'ne vati'ne ogo laa' ive ma ningilisa vani' nehe. 25 Nanite' ningilisa vani' neve. Ve mali'mo genegana lamine' goloso ngolo minine' ningilisa vani' neve. E'e, a'mine ne'mine genegana ngili minaa' nave nene guve'inesi ve nabavo' minangu' mini inite' lamine' taminekovo' di ngolize izi minaa' nave. 26 Nemu' nene nanite' ningilisa ebe' hadivela vani' neve. Polohete ningilisa vani' noloseive. Olo. Ee, a'mine vi ningave nene polohete ma ve. A'mine ve nene polohete gomu' minani' ne'mine minamo ngivile' ogosa neive. 27 Ido' a'mine vemu' nene mono' godolou' O'moso'mo do lu' izelive lo imiselelesa live lo-emo line' gamazi ma ti' li gizi nizani' ma neive:

Gelezo. Naza neze gamazi lo-ngeme ngeme' ilive ma imiselekuvo
aza do gomu' molo akaka vele-gedeleseive.
A'mine gamazi nene a'mine ve Zohane'nimu' gizani' ve.

28 Ne'mine ani' nene naza ma lo-lengemelove. Evene' misubouko soto' igi mini di aveuti' nene mono' noso holo-ngedaa' ive Zohane'ni nene ivile' igi minave ma minamani' ve. Ne neiha O'moso'mo evene'velo' gizebo iline' gamene've soto' ogavo a'mine gizebo o-ngedelingu' vi hilalizave engikuti' ma lemo minilive'mosi nene Zohane' minine' monovo nene ivile' ivo minilizado' o neive.

29 Ido' evene' linge masi ido' takisi moni daa' avesi nene gomu' Zohanedati' noso hili minani' ne'mo Izesu' Zohane'nimu' line' gamazi nene gili hize ele' igi O'moso opo'ni lani'za 30 Halisaio' mono' laa' avesi ido' lou' gamazi apizi ngimaa' avesi ingine Zohanedati' mono' noso hilamani' ne'mo nene O'moso'mo engikumu' ne'mine ne'mine ilizave lo galau' gelo ilizani' aka do soto' o-ngidine' nene ningi hulikeve.

31 Ido' Izesu' imine' molo ti' lo line': Idise mene gamenela mine do vuvoni' ningi nizani' alevemu' nene nani'mine inite' ne'mine nizave lo lo molo lolove. Ido' engikumu' nene naniteto' lo molo lokuvo vo dalive. 32 Engikumu' nene izipe linge malo' lo molo lolosuve. A'mine izipe nene gili gosele' asele' izipe mini do gese' oga' ebeto' zohi' igi mini gono'ninginemu' nene ti' li laa' nave:

Laza lengikumu' huhunale' mulunido' nene
longolize izi gizedine adine izisa'mave.
Ido' nama muhele' ahele' ogo lunido' nene
lingine a'mine'mine igi muhele' ahele' igi lisa'mave.
33 Naza ne'mini nizave luvoni' nene ne'mine minangumu' luvoni' ve: Mono' noso holo-ngedaa' ive Zohane' aza gono've do do vingu' nene noso' nite' lamine' namo ido' vaini nososi namo neivo lingine ningi gosele' lengebelavo ti' li lani' ve: Ve mene sikalahu' goloso mali'mo lulo do gopo o-davo ne'mine neihe li lani' ve. 34 Ido' O'mosolati' ve gihile naza ogo noso' nite' di gese' igi ni nizangu' vo naa' ido' vaini nososi nene naa' nouvo lingine ningi gosele' lengebelavo soza gamazi li ti' li laa' nave: Ve mene ningilo. Aza nene vele gohi nave mino ido' noso geligelo naa' ive mino takisi moni daa' avesi ido' mono' gilami lihime daa' ave gohi masi nene zogo molo ngemaa' ive ne neive. 35 Ne'mine laa' nani'za O'moso'mo otohato monovolo' ogo molo minaa' neine' emeni dameni do ti' o nonive muki' nene a'mine emeni dameni lamine' neine' nene lengelebizaa' noune.

36 Ido' Izesu' nene Halisaio' mono' laa' ive mali'mo numu'veu' noso' nite' maka' naakumu' elese molo-davo a'mine ve'mi numu'veu' dizo noso' nite' no minine'. 37 Neivo a'mine numuno ebekuti' vene' ma monovo golosolo' monaa' ine' vene' minidi'mo Izesu' nene Halisaio' ve'mi numu'veu' noso' nite' no minine' nene mo gelo luhuvo laminekisi gehenidunu' lili' ani' botoloku' unuvo laminekisi uveli minine' nene do ogo 38 mehenela ogo gizenela mino ive neivo vele novozo ne'mo Izesu' gizenelo' nene lemavo maduno zopovo nedunu' gilite hulo-do gizene nene upa' ele-do mino a'mine unuvo laminekisi uveli nene holo-dine'. 39 Noholo-divo Halisaio' ve Izesu'ni noso' niteto' elese molo-dive aza nene ningo asi've lulou' ti' lo line': A'mine ve nene polohete minidiniko a'mine oko'nolo' nodo giline' vene' nene monovo golosolo' monaa' ine' vene' neive lo gele mino oko'nelo' do gelamozo lo o've lo-didine. 40 Ne'mine lo nogilivo Izesu' aza a'mine Halisaio' ve ti' lo lo-imine': Simonizo, nenitati' nene gei' lo-gemeloni' gamazi ma neive. Lavo aza ti' lo line': Tisazo, a'mine gamazika nene lovo. 41 Ne'mine lavo Izesu' ti' lo line': Ve mali'mo alinge' nimilisingumu' ve lo moni dina' ogo faef hadeti kina (K500) ve ma emo ve ma nene fifti kina (K50) imine'. 42 Ne'mine ine'za ingine alinge' nene ngeli bekimi i-damilisine' ogavo moni dina' ogo ngimive aza nene nevo alamilizo lo o've lo-ngidine'. Ne'mine lavosa engikuti' nene ezemu' mulunou' lamine' nabalo' zaho gele nolive. 43 Ne'mine lavo Simoni aza ti' lo line': Naza giluvoni' nene moni nabalo' goloso dina' ogavo lihime nabalo' goloso hulo-dive nene noloseive lo lavo Izesu' ti' lo line': Gaza mo gihile lane. 44 Ne'mine lo Izesu' velepe' ize veneta ogo Halisaio' ve Simoni'ni nene ti' lo lo-imine': Gaza vene' mene ninge nabe. Gaza nene Zuda ve leli' monovotelo' e'meto nele'mize lamine' olosa gei' iline' inite' nene amanivo vene' me'mo noo-nidive. Gaza nene numungau' okuvo gize'ne noso' izeloni' noso ma lepe molo-nedamanivo vene' me'mo nene vele novozodunu' gize'nelo' nene noso ize-nedo maduno zopovodunu' nene nogilite-nidive. 45 Ido' go'ne ve'ne elo namanivo vene' me'mo naza ogo numungau' dizuvodoti' gize'ne nene upa' lo-nedo neine' nene osu' lamive. 46 Ido' madu'neu' nene gaza uveli ma lepo holo-nedamanivo vene' me'mo nene unuvo lamine' oga' ine' uvelidunu' gize'nelo' holo-nedave. 47 Nemu' nene naza ma lo-gemelove. Vene' aza nene lulo nabalo' goloso nimine' ne'mo lihime've nabalo' goloso minine' apase-dine' nene soto' o neive. Ne'mine ogani'za ve ma aza lihime've ngomo apase-delove ne'mo nene lulo ngomo ne'mine nemaa' neive. 48 Ne'mine lo vene' nene ti' lo lo-imine': Gei' lihimeka nene mo apase-gedekuve. 49 Ne'mine lavo noso' nite' maka' ni minave ingine nene api' igi lu'ningu' ti' li lani': Ve mene ve nani'mine ve minidi'mo lihime'ine hulo-ngedaatokisi lisihe' o neive. 50 Ne'mine li lu'ningu' nilavo Izesu' aza vene' nene ti' lo lo-imine': Nenikumu' gei' gele ele'vole' aineka ne'mo lihime akaloti' gele'mize lamine' ogaze. Mulungau' zou lo minivo numungala vozo lo lo-dine'.